By Odisha Prabhab 
ନ୍ୟୁଜିଲାଣ୍ଡ ମାଟିରେ ଭାରତର ଦମଦାର ପ୍ରଦର୍ଶନ । ଆଗଧାଡ଼ିର ବ୍ୟାଟର ବିଫଳ, କିନ୍ତୁ ହାର ମାନିଲାନି ଟିମ୍ ଇଣ୍ଡିଆ । ଶେଷ ମୁହୂର୍ତ୍ତରେ ଦଳକୁ ବିଜୟ ଦେଲେ ତିଲକ ବର୍ମା ଓ ନୀତିଶ କୁମାର ରେଡ୍ଡୀ । ରୋମାଞ୍ଚକର ମୁକାବିଲାରେ ନ୍ୟୁଜିଲାଣ୍ଡକୁ ୪ ୱିକେଟରେ ପରାସ୍ତ କରିଛି ଭାରତ । ଏହି ବିଜୟ ସହ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ରେ ଭାରତ ୨-୦ରେ ଆଗୁଆ ରହିଛି । ଚାପରେ ଥାଇ ମଧ୍ୟ ଭାରତୀୟ ଯୁବ ବ୍ୟାଟରମାନେ ଯେଉଁଭଳି ଭାବେ ଲଢ଼େଇ କରିଛନ୍ତି, ତାହା ଏବେ ଚର୍ଚ୍ଚାର ବିଷୟ । ନ୍ୟୁଜିଲାଣ୍ଡର କ୍ରାଏଷ୍ଟଚର୍ଚ୍ଚସ୍ଥିତ ହାଗଲି ଓଭାଲରେ ଖେଳାଯାଇଥିବା ଦ୍ୱିତୀୟ ଟି-୨୦ ମ୍ୟାଚ୍ରେ ଭାରତୀୟ ଦଳ ହାସଲ କରିଛି ଏକ ଗୁରୁତ୍ୱପୂର୍ଣ୍ଣ ବିଜୟ । ୧୮୧ ରନ୍ର ବିଜୟ ଲକ୍ଷ୍ୟକୁ ପିଛା କରି ଭାରତ ୧୯.୫ ଓଭରରେ ୬ଟି ୱିକେଟ୍ ହରାଇ ଲକ୍ଷ୍ୟରେ ପହଞ୍ଚିଥିଲା । ମ୍ୟାଚ୍ରେ ଭାରତୀୟ ଅଧିନାୟକ ଶ୍ରେୟସ ଆୟର ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲେ । ଲକ୍ଷ୍ୟ ଥିଲା ନ୍ୟୁଜିଲାଣ୍ଡକୁ କମ୍ ରନ୍ରେ ଅଟକାଇବା । ଏହାପରେ ୧୮୧ ରନ୍ର ଟାର୍ଗେଟ୍ ନେଇ ପଡ଼ିଆକୁ ଓହ୍ଲାଇଥିଲା ଭାରତୀୟ ଦଳ । କିନ୍ତୁ ଭାରତର ଆରମ୍ଭ ଆଶାନୁରୂପ ହୋଇନଥିଲା । ଓପନର ସଞ୍ଜୁ ସାମସନ୍ ୧୪ ରନ୍ କରି ଆଉଟ୍ ହୋଇଥିବାବେଳେ ଅଭିଷେକ ଶର୍ମା ୨୭ ରନ୍ କରି ପାଭିଲିୟନ୍ ଫେରିଥିଲେ । ଏହି ମ୍ୟାଚ୍ରେ ଖେଳିବାର ସୁଯୋଗ ପାଇଥିବା ଯୁବ ଖେଳାଳି ବୈଭବ ସୂର୍ଯ୍ୟବଂଶୀଙ୍କ ବ୍ୟାଟ୍ ମଧ୍ୟ ଚାଲିନଥିଲା । ସେ ମାତ୍ର ୪ ରନ୍ କରି ଆଉଟ୍ ହୋଇଥିଲେ । ଏହାପରେ ଅଧିନାୟକ ଶ୍ରେୟସ ଆୟର ୭ ରନ୍ ଏବଂ ଅକ୍ଷର ପଟେଲ ୧୧ ରନ୍ କରି ଆଉଟ୍ ହୋଇଥିଲେ । ଲଗାତାର ୱିକେଟ୍ ପତନ ଯୋଗୁଁ ଭାରତୀୟ ଦଳ ଚାପରେ ପଡ଼ିଥିଲା । ଏହି ସମୟରେ ନମନ ଧୀର ୧୭ଟି ବଲ୍ରୁ ଗୋଟିଏ ଚୌକା ଓ ୩ଟି ଛକା ସହ ୩୧ ରନ୍ କରି ଦଳର ରନ୍ଗତି ବଢ଼ାଇଥିଲେ । ତେବେ ମ୍ୟାଚ୍ର ମୋଡ଼ ବଦଳାଇଥିଲେ ତିଲକ ବର୍ମା ଓ ନୀତିଶ କୁମାର ରେଡ୍ଡୀ । ଉଭୟ ଚାପକୁ ସାମ୍ନା କରି ଦଳକୁ ବିଜୟ ଆଡ଼କୁ ନେଇଥିଲେ । ସପ୍ତମ ୱିକେଟ୍ ପାଇଁ ଦୁହେଁ ୬୯ ରନ୍ର ଗୁରୁତ୍ୱପୂର୍ଣ୍ଣ ଭାଗୀଦାରି କରିଥିଲେ । ତିଲକ ବର୍ମା ୬ଟି ଚୌକା ଓ ଗୋଟିଏ ଛକା ସହ ଅପରାଜିତ ୫୧ ରନ୍ କରିଥିଲେ । ସେହିପରି ନୀତିଶ କୁମାର ରେଡ୍ଡୀ ଦ୍ରୁତ ବ୍ୟାଟିଂ କରି ୨୦୦ ଷ୍ଟ୍ରାଇକ୍ ରେଟ୍ରେ ଅପରାଜିତ ୨୬ ରନ୍ ସଂଗ୍ରହ କରିଥିଲେ । ଏହି ଦୁଇ ଖେଳାଳିଙ୍କ ଧୈର୍ଯ୍ୟ ଓ ଆକ୍ରମଣାତ୍ମକ ବ୍ୟାଟିଂ ହିଁ ଭାରତକୁ ବିଜୟୀ କରାଇଥିଲା । ଏହି ବିଜୟ ସହ ଭାରତ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ରେ ୨-୦ରେ ଆଗୁଆ ରହିଛି । ଆଗଧାଡ଼ିର ବ୍ୟାଟର ବିଫଳ ହୋଇଥିଲେ ମଧ୍ୟ ମଧ୍ୟକ୍ରମ ଓ ନିମ୍ନକ୍ରମର ଖେଳାଳିଙ୍କ ଲଢ଼ୁଆ ପ୍ରଦର୍ଶନ ଭାରତର ବିଜୟରେ ନିର୍ଣ୍ଣାୟକ ହୋଇଛି । ଏବେ ଭାରତୀୟ ଦଳର ନଜର ସିରିଜ୍ର ପରବର୍ତ୍ତୀ ମ୍ୟାଚ୍ ଉପରେ