By Odisha Prabhab 
ବଢୁଛି ଗରମ, ଆଉ ଗରମରୁ ଆରାମ ପାଇବା ପାଇଁ ଏସି ଏବେ ଅନେକଙ୍କ ଘରର ଆବଶ୍ୟକତା ପାଲଟିଛି । ଦିନ ତ ଦିନ, ରାତିରେ ମଧ୍ୟ ଏସି ଚାଲୁ କରି ଶୋଉଛନ୍ତି ଅନେକ ଲୋକ। କିନ୍ତୁ ରାତିସାରା ଏସିରେ ରହିବା ସମୟରେ କିଛି ସାବଧାନତା ଜରୁରୀ। ନଚେତ୍ ଶରୀରରେ ଦେଖାଦେଇପାରେ କିଛି ସମସ୍ୟା। ଗରମରୁ ମୁକ୍ତି ଦିଏ ଏସି। କିନ୍ତୁ ଅତ୍ୟଧିକ ଥଣ୍ଡା ଏବଂ ଶୁଷ୍କ ପରିବେଶରେ ଦୀର୍ଘ ସମୟ ରହିଲେ କେତେକ ଲୋକଙ୍କଠାରେ ଅସୁବିଧା ହୋଇପାରେ। ଏସି ଚାଲିବା ସମୟରେ ଘରର ଆର୍ଦ୍ରତା କମିପାରେ। ଏହାର ପ୍ରଭାବରେ ତ୍ୱଚା ଶୁଷ୍କ ହେବା, ଓଠ ଶୁଖିଯିବା, ନାକ ଓ ଆଖିରେ ଶୁଷ୍କତା କିମ୍ବା ଜଳାପୋଡ଼ା ଭଳି ସମସ୍ୟା କେତେକ ଲୋକଙ୍କଠାରେ ଦେଖାଦେଇପାରେ। ସେହିପରି ଥଣ୍ଡା ଓ ଶୁଷ୍କ ବାୟୁ ଯୋଗୁଁ ସକାଳୁ ଉଠିବା ପରେ ଗଳା ଶୁଖିବା କିମ୍ବା ଅସୁବିଧା ଅନୁଭବ ହୋଇପାରେ। ବିଶେଷକରି ଆଲର୍ଜି କିମ୍ବା ଶ୍ୱାସ ସମ୍ବନ୍ଧୀୟ ସମସ୍ୟା ଥିବା ବ୍ୟକ୍ତିମାନେ ନିଜ ଅନୁଭବ ଅନୁସାରେ ଅଧିକ ସେନ୍ସିଟିଭ୍ ହୋଇପାରନ୍ତି । ତେବେ ଏଥିପାଇଁ ଏସି ବନ୍ଦ କରିଦେବା ଦରକାର ନାହିଁ। ବରଂ ଏସି ବ୍ୟବହାର କରିବା ସମୟରେ କିଛି ସାବଧାନତା ରଖିବା ଜରୁରୀ। ପ୍ରଥମେ, ଘରକୁ ଅତ୍ୟଧିକ ଥଣ୍ଡା ନକରି ଆରାମଦାୟକ ତାପମାତ୍ରାରେ ଏସି ଚଲାନ୍ତୁ। ଏସିର ଫିଲ୍ଟରକୁ ନିୟମିତ ସଫା କରନ୍ତୁ। ଘରର ବାୟୁ ଅତ୍ୟଧିକ ଶୁଷ୍କ ଲାଗୁଥିଲେ ଆର୍ଦ୍ରତା ମାପିବା ପାଇଁ ହ୍ୟୁମିଡିଟି ମିଟର ବ୍ୟବହାର କରିପାରିବେ। ଏବେ ଆସିବା ଯାଉଛି ଏକ ସାଧାରଣ ଉପାୟକୁ ନେଇ। ଏସି ରୁମରେ ପାଣି ଭର୍ତ୍ତି ବାଲଟି ରଖିଲେ ଆର୍ଦ୍ରତା ବଢ଼ିବ ବୋଲି କୁହାଯାଏ। କିନ୍ତୁ ଏହା ଏକ ନିୟନ୍ତ୍ରିତ ହ୍ୟୁମିଡିଫାୟରର ବିକଳ୍ପ ନୁହେଁ ଏବଂ ଏହାର ପ୍ରଭାବ ଘରର ପରିବେଶ ଉପରେ ନିର୍ଭର କରେ। ସ୍ଥିର ପାଣି ଦୀର୍ଘ ସମୟ ରଖି ନଦେବା ମଧ୍ୟ ଜରୁରୀ। ନିୟମିତ ପାଣି ବଦଳାନ୍ତୁ ଏବଂ ପାତ୍ରକୁ ସଫା ରଖନ୍ତୁ। ନଚେତ୍ ମଶା ବଂଶବୃଦ୍ଧି କରିବାର ଆଶଙ୍କା ରହିପାରେ।
ସବୁଠାରୁ ଗୁରୁତ୍ୱପୂର୍ଣ୍ଣ କଥା ଏସି ଆମକୁ ଗରମରୁ ଆରାମ ଦେଉଛି, କିନ୍ତୁ ସଠିକ୍ ତାପମାତ୍ରା, ସଫା ଫିଲ୍ଟର ଏବଂ ଠିକ୍ ଆର୍ଦ୍ରତା ରଖିବା ମଧ୍ୟ ସେତିକି ଜରୁରୀ। ଯଦି ଏସି ବ୍ୟବହାର ପରେ ଲଗାତାର ଗଳା, ଆଖି କିମ୍ବା ଶ୍ୱାସ ସମସ୍ୟା ହେଉଛି, ତେବେ ଡାକ୍ତରଙ୍କ ପରାମର୍ଶ ନିଅନ୍ତୁ ।