By Odisha Prabhab 
ବଲିଉଡ୍ ଅଭିନେତା ଟାଇଗର ଶ୍ରଫ୍ଙ୍କ କାର୍ ଉପରକୁ ଗୁଳିମାଡ଼। ମୁମ୍ବାଇର ଜୁହୁ ଅଞ୍ଚଳରେ ଘଟିଥିବା ଏହି ଘଟଣାକୁ ନେଇ ବଲିଉଡ୍ ଜଗତରେ ହଇଚଇ। ତେବେ ଏହି ଆକ୍ରମଣ ପଛରେ ରହିଛି କି ସଲମାନ ଖାନଙ୍କ ସହ ଟାଇଗରଙ୍କ ସମ୍ପର୍କ? ଲରେନ୍ସ ବିଷ୍ଣୋୟୀ ଗ୍ୟାଙ୍ଗ୍ ସହ ଜଡ଼ିତ ବୋଲି ଦାବି କରୁଥିବା କିଛି ବ୍ୟକ୍ତି ଆକ୍ରମଣର ଦାୟିତ୍ୱ ନେଇଥିବା ଖବର ସାମ୍ନାକୁ ଆସିଛି। ଏପରିକି ସଲମାନଙ୍କ ସହ କାମ କରୁଥିବା କଳାକାରଙ୍କୁ ମଧ୍ୟ ଧମକ ଦିଆଯାଇଥିବା ଦାବି କରାଯାଇଛି। ବଲିଉଡ୍ରେ ପୁଣି ଆତଙ୍କର ଛାୟା। ଏଥର ଟାର୍ଗେଟ୍ରେ ଅଭିନେତା ଟାଇଗର ଶ୍ରଫ୍। ରବିବାର ସନ୍ଧ୍ୟାରେ ମୁମ୍ବାଇର ଜୁହୁ ଅଞ୍ଚଳରେ ଟାଇଗରଙ୍କ କାର୍ ଉପରକୁ ଗୁଳିମାଡ଼ ହୋଇଥିବା ଖବର ସାମ୍ନାକୁ ଆସିଛି। ଏକ ଫୁଟବଲ୍ ମ୍ୟାଚ୍ ପରେ ଟାଇଗର ଫେରୁଥିବା ବେଳେ ଏହି ଘଟଣା ଘଟିଥିଲା। ବାଇକ୍ରେ ଆସିଥିବା ତିନି ଜଣ ଅଜଣା ବ୍ୟକ୍ତି ତାଙ୍କ କାର୍ ଉପରକୁ ଗୁଳି ଚଳାଇ ଫେରାର୍ ହୋଇଯାଇଥିବା ପ୍ରାରମ୍ଭିକ ରିପୋର୍ଟରୁ ଜଣାପଡ଼ିଛି। ଏହି ଘଟଣାରେ ଟାଇଗର ଶ୍ରଫ୍ ସୁରକ୍ଷିତ ଥିବା ବେଳେ ତାଙ୍କ ଡ୍ରାଇଭରଙ୍କ ସମେତ ଅନ୍ୟ ଜଣେ ବ୍ୟକ୍ତି ଆହତ ହୋଇଥିବା ଖବର ମିଳିଛି। ଆହତଙ୍କୁ ଚିକିତ୍ସା ପାଇଁ ହସ୍ପିଟାଲ୍ ନିଆଯାଇଛି। ଘଟଣା ପରେ ମୁମ୍ବାଇ ପୋଲିସ ତଦନ୍ତ ଆରମ୍ଭ କରିଛି। ଏବେ ଏହି ଘଟଣାର ସବୁଠୁ ଚର୍ଚ୍ଚିତ ଦିଗ ହେଉଛି ସଲମାନ ଖାନଙ୍କ ସହ ଟାଇଗର ଶ୍ରଫ୍ଙ୍କ ସମ୍ପର୍କ। ଆକ୍ରମଣ ପରେ ସୋସିଆଲ୍ ମିଡିଆରେ ଏକ ପୋଷ୍ଟ ଏବଂ ଅଡିଓ ବାର୍ତ୍ତା ସାମ୍ନାକୁ ଆସିଥିବା ରିପୋର୍ଟ ହୋଇଛି। ଏଥିରେ ଅନିଲ ପଣ୍ଡିତ ଓ ହରମନ ସାନ୍ଧୁ ନାମକ ବ୍ୟକ୍ତିମାନେ ଆକ୍ରମଣର ଦାୟିତ୍ୱ ନେଇଥିବା ଦାବି କରାଯାଇଛି। ସେମାନେ ନିଜକୁ ଲରେନ୍ସ ବିଷ୍ଣୋୟୀ ଗ୍ୟାଙ୍ଗ୍ ସହ ଜଡ଼ିତ ବୋଲି ଦାବି କରିଥିବା ଖବର ପ୍ରକାଶ ପାଇଛି। ସଲମାନ ଖାନଙ୍କ ସହ କାମ ନକରିବାକୁ ପୂର୍ବରୁ ଚେତାବନୀ ଦିଆଯାଇଥିଲା ଏବଂ ତାହାକୁ ଅଣଦେଖା କରିବାରୁ ଟାଇଗରଙ୍କୁ ଟାର୍ଗେଟ୍ କରାଯାଇଥିବା ମଧ୍ୟ ଦାବି ହୋଇଛି।