ପୋଟଳ, ପିଆଜ, ବାଇଗଣ ୬୦ ପାର୍ କାର୍ତ୍ତିକ ପୂର୍ବରୁ ବଢିଲା ଚିନ୍ତା !

କାର୍ତ୍ତିକ ମାସ ଆରମ୍ଭ ହେବାକୁ ଯାଉଛି, ହେଲେ ତା’ ପୂର୍ବରୁ ଖାଉଟିଙ୍କୁ ଘାରିଲାଣି ପରିବା ଚିନ୍ତା। ବଜାରକୁ ଗଲେ ପରିବା ଦେଖିବାକୁ ମିଳୁଛି, ହେଲେ ଦର ଶୁଣିଲେ ମୁଣ୍ଡ ଘୂରାଇ ଦେଉଛି। ପୋଟଳ ହେଉ କି ପିଆଜ, ବାଇଗଣ ହେଉ କି କାଙ୍କଡ଼, ଅଧିକାଂଶ ପରିବାର ଦର କିଲୋ ପ୍ରତି ୬୦ ଟଙ୍କା ଉପରେ। କିଛି ପରିବାର ଦାମ୍ ୮୦ ଟଙ୍କା ପାର୍ କରିଥିବା ଅଭିଯୋଗ ହେଉଛି। ରାଜଧାନୀ ଭୁବନେଶ୍ୱରଠାରୁ ରାଜ୍ୟର ଅନ୍ୟ ବଜାର ପର୍ଯ୍ୟନ୍ତ ଦରବୃଦ୍ଧିକୁ ନେଇ ଚିନ୍ତାରେ ଖାଉଟି। ସେପଟେ ଲଗାତାର ବର୍ଷା ଓ ବନ୍ୟାକୁ ଦରବୃଦ୍ଧିର କାରଣ କହୁଛନ୍ତି ବ୍ୟବସାୟୀ । ପବିତ୍ର କାର୍ତ୍ତିକ ମାସ ଆସିବା ପୂର୍ବରୁ ପରିବା ବଜାରରେ ଲାଗିଲାଣି ନିଆଁ। ଦିନକୁ ଦିନ ବଢ଼ୁଥିବା ଦର ଏବେ ସାଧାରଣ ଲୋକଙ୍କ ପକେଟ୍‌କୁ ଦେଉଛି ବଡ଼ ଝଟକା। ବଜାରକୁ ଯାଇ ପରିବା କିଣିବା ପୂର୍ବରୁ ଦଶଥର ଭାବିବାକୁ ପଡ଼ୁଛି ଖାଉଟିଙ୍କୁ । ଯେଉଁ ପରିବା କିଛି ଦିନ ପୂର୍ବରୁ କମ୍ ଦାମରେ ମିଳୁଥିଲା, ଏବେ ସେହି ପରିବା କିଣିବାକୁ ଅଧିକ ଟଙ୍କା ଗଣିବାକୁ ପଡ଼ୁଛି । ପୋଟଳ, ପିଆଜ, ବାଇଗଣ ଓ କାଙ୍କଡ଼ ଭଳି ପରିବାର ଦର ଅନେକ ବଜାରରେ ୬୦ ଟଙ୍କା ଉପରେ ରହିଛି । କିଛି ପରିବାର ଦାମ୍ ୮୦ ଟଙ୍କା ଟପିଥିବା କୁହାଯାଉଛି । ଫଳରେ ଗୋଟିଏ ପରିବା ବ୍ୟାଗ୍ ଭରିବା ପାଇଁ ଖାଉଟିଙ୍କୁ ଖର୍ଚ୍ଚ କରିବାକୁ ପଡ଼ୁଛି ଅଧିକ ଟଙ୍କା। ମଧ୍ୟବିତ୍ତ ପରିବାରର ମାସିକ ବଜେଟ୍ ଉପରେ ଏହାର ସିଧାସଳଖ ପ୍ରଭାବ ପଡ଼ୁଛି । ଓଡ଼ିଶାରେ କାର୍ତ୍ତିକ ମାସର ରହିଛି ସ୍ୱତନ୍ତ୍ର ଧାର୍ମିକ ମହତ୍ତ୍ୱ । ଏହି ମାସରେ ଅନେକ ପରିବାର ଆମିଷ ଖାଦ୍ୟଠାରୁ ଦୂରେଇ ରହି ନିରାମିଷ ଭୋଜନ କରନ୍ତି । ହବିଷ୍ୟାଳିମାନେ ମଧ୍ୟ ନିୟମ ଅନୁସାରେ ଖାଦ୍ୟ ଗ୍ରହଣ କରନ୍ତି। ତେଣୁ ଏହି ସମୟରେ ପରିବାର ଚାହିଦା ବଢ଼ିବାର ସମ୍ଭାବନା ରହିଛି। ଏଭଳି ସମୟରେ ଦର ନିୟନ୍ତ୍ରଣକୁ ନେଇ ଖାଉଟିଙ୍କ ଚିନ୍ତା ବଢ଼ିଛି । ସେପଟେ ପରିବା ଦର ବୃଦ୍ଧି ପଛରେ ଲଗାତାର ବର୍ଷା ଓ ବନ୍ୟାର ପ୍ରଭାବ ଥିବା କହୁଛନ୍ତି ବ୍ୟବସାୟୀ। ବର୍ଷା ଯୋଗୁଁ କିଛି ଅଞ୍ଚଳରେ ପରିବା ଫସଲ ନଷ୍ଟ ହେବା ସହ ଅମଳ ଓ ପରିବହନ ପ୍ରଭାବିତ ହୋଇଥାଇପାରେ। ଫଳରେ ବଜାରକୁ ପର୍ଯ୍ୟାପ୍ତ ପରିମାଣରେ ପରିବା ଆସିବାରେ ସମସ୍ୟା ହେଉଛି। ଯୋଗାଣ କମିଲେ ଦର ବଢ଼ିବାର ଆଶଙ୍କା ରହିଥାଏ। କିନ୍ତୁ ଏହି ଦରବୃଦ୍ଧି କେବେ ନିୟନ୍ତ୍ରଣକୁ ଆସିବ, ତାହା ଏବେ ବଡ଼ ପ୍ରଶ୍ନ ।