ଓଡ଼ିଶାରୁ କମୁଛି ନବୀନଙ୍କ ପ୍ରତି ଭଲପାଇବା ?

ଦୀର୍ଘ ୨୪ ବର୍ଷ ଧରି ଓଡ଼ିଶା ରାଜନୀତିରେ ଏକଛତ୍ର ପ୍ରଭାବ ରଖିଥିଲେ ନବୀନ ପଟ୍ଟନାୟକ । ଓଡିଶା ରାଜନୀତିରେ ନବୀନଙ୍କ ନାଁ ହିଁ ଯଥେଷ୍ଟ ଥିଲା । ନବୀନଙ୍କ ନାଁ ନେଇ କେହି ବି ନିର୍ବାଚନ ଜିତିପାରେ ବୋଲି ଓଡିଶାର ଘରେ ଘରେ ଚର୍ଚ୍ଚା ହେଉଥିଲା । ନବୀନଙ୍କ ନେତୃତ୍ୱକୁ କେନ୍ଦ୍ର କରି ଦୀର୍ଘ ବର୍ଷ ଧରି ନିର୍ବାଚନ ଲଢ଼ିଛି ବିଜେଡି । କିନ୍ତୁ ୨୦୨୪ ନିର୍ବାଚନ ପରେ ବଦଳିଛି ଓଡ଼ିଶାର ରାଜନୈତିକ ଚିତ୍ର। ଏବେ ପ୍ରଶ୍ନ ଓଡ଼ିଶାରେ କମୁଛି କି ନବୀନଙ୍କ କ୍ରେଜ୍ ? ୨୦୨୪ ବିଧାନସଭା ନିର୍ବାଚନରେ ବିଜେଡିକୁ ବଡ଼ ଝଟକା ଲାଗିଥିଲା। ୧୪୭ ଆସନ ବିଶିଷ୍ଟ ବିଧାନସଭାରେ ବିଜେପି ୭୮ଟି ଆସନ ଜିତି ସରକାର ଗଠନ କରିଥିଲା। ଅନ୍ୟପଟେ ବିଜେଡି ୫୧ଟି ଆସନରେ ସୀମିତ ରହିଥିଲା। ଏହା ସହିତ ୨୦୦୦ ମସିହା ପରେ ପ୍ରଥମ ଥର ପାଇଁ ବିଜେଡି ସରକାରରୁ ବାହାରି ବିରୋଧୀ ଦଳକୁ ଯାଇଥିଲା। କେବଳ ବିଧାନସଭା ନୁହେଁ, ଲୋକସଭା ନିର୍ବାଚନରେ ମଧ୍ୟ ବିଜେଡିକୁ ବଡ଼ କ୍ଷତି ସହିବାକୁ ପଡ଼ିଥିଲା। ଓଡ଼ିଶାର ୨୧ଟି ଲୋକସଭା ଆସନରୁ ବିଜେପି ୨୦ଟି ଆସନ ଜିତିଥିବା ବେଳେ ବିଜେଡି ଖାତା ଖୋଲିପାରିନଥିଲା। ଏହି ଫଳାଫଳ ନବୀନଙ୍କ ଦୀର୍ଘ ଦିନର ରାଜନୈତିକ ପ୍ରଭାବକୁ ନେଇ ନୂଆ ଚର୍ଚ୍ଚା ସୃଷ୍ଟି କରିଥିଲା। ତେବେ ଏହାର ଅର୍ଥ କଣ ନବୀନଙ୍କ ଲୋକପ୍ରିୟତା ସମ୍ପୂର୍ଣ୍ଣ ଭାବେ କମିଯାଇଛି? ଏହାର ଉତ୍ତର ଏତେ ସରଳ ନୁହେଁ। କାରଣ ନବୀନ ପଟ୍ଟନାୟକ ଏବେ ବି ବିଜେଡିର ସବୁଠାରୁ ବଡ଼ ଚେହେରା। ବିରୋଧୀ ଦଳରେ ଥାଇ ମଧ୍ୟ ଦଳୀୟ ନେତା ଓ କର୍ମୀଙ୍କୁ ଏକାଠି ରଖିବା ପାଇଁ ସେ ନିୟମିତ ବୈଠକ କରୁଛନ୍ତି। ନିର୍ବାଚନ ପରାଜୟ ପରେ ବିଜେଡି ନିଜ ସଂଗଠନକୁ ପୁଣି ମଜବୁତ କରିବା ଉପରେ ଗୁରୁତ୍ୱ ଦେଉଛି। ଅନ୍ୟପଟେ ଦଳର ଦ୍ୱିତୀୟ ସାରି ନେତୃତ୍ୱ, ସଂଗଠନ ଓ ଭବିଷ୍ୟତ ରଣନୀତିକୁ ନେଇ ମଧ୍ୟ ଚର୍ଚ୍ଚା ଜାରି ରହିଛି। ଭି.କେ. ପାଣ୍ଡିଆନଙ୍କ ରାଜନୈତିକ ଭୂମିକା ଏବଂ ୨୦୨୪ ପରେ ବିଜେଡିର ସଂଗଠନକୁ ନେଇ ଉଠିଥିବା ପ୍ରଶ୍ନ ଦଳ ପାଇଁ ଏକ ବଡ଼ ଚ୍ୟାଲେଞ୍ଜ। ଏହାରି ଭିତରେ ବିଜେପି ସରକାରର କାର୍ଯ୍ୟକଳାପ ମଧ୍ୟ ନବୀନଙ୍କ ରାଜନୈତିକ ପୁନର୍ବାର ଫେରିବାର ସମ୍ଭାବନାକୁ ପ୍ରଭାବିତ କରିପାରେ। ସରକାର ପ୍ରତି ଲୋକଙ୍କ ମତ, ବିଜେଡିର ବିରୋଧୀ ରାଜନୀତି ଏବଂ ସ୍ଥାନୀୟ ସଂଗଠନ ଏହି ତିନୋଟି ଦିଗ ଆଗାମୀ ଦିନରେ ବେଶ୍ ଗୁରୁତ୍ୱପୂର୍ଣ୍ଣ ହେବ। ତେଣୁ ଏବେ ପ୍ରଶ୍ନ ହେଉଛି ୨୦୨୪ର ପରାଜୟ କେବଳ ଏକ ନିର୍ବାଚନୀ ଝଟକା, ନା ନବୀନଙ୍କ ଦୀର୍ଘ ଦିନର ରାଜନୈତିକ ପ୍ରଭାବରେ ଆସିଛି ବଡ଼ ପରିବର୍ତ୍ତନ ? ଆଗାମୀ ନିର୍ବାଚନରେ ଏହାର ପ୍ରକୃତ ଉତ୍ତର ମିଳିବ। ନବୀନ ପଟ୍ଟନାୟକ ପୁଣି ନିଜ ପୁରୁଣା ଜନସମର୍ଥନ ଫେରାଇ ଆଣିପାରିବେ କି, ନା ଓଡ଼ିଶାର ରାଜନୀତିରେ ଆରମ୍ଭ ହୋଇଯାଇଛି ନୂଆ ଯୁଗ ଏବେ ସମସ୍ତଙ୍କ ନଜର ସେହି ଦିଗରେ ।