ସହରରେ ଶସ୍ତାରେ ଭଡାଘର ଦେବେ ସରକାର !

ଶସ୍ତାରେ ମିଳିବ ଭଡା ଘର । ଗରିବ ଓ ଦିନ ମଜୁରିଆଙ୍କୁ ସୁଲଭ ମୂଲ୍ୟରେ ବାସଗୃହ ଯୋଗାଇବେ ସରକାର । ପ୍ରଧାନମନ୍ତ୍ରୀ ଆବାସ ଯୋଜନା ସହରାଞ୍ଚଳ ୨.୦ ଅଧିନରେ ଲୋକଙ୍କୁ ମିଳିବ ସବସିଡି ଭଡ଼ା ସହିତ ଶସ୍ତା ଘର ସୁବିଧା। ମୋଦି ସରକାର ସହରରେ ରହୁଥିବା ଗରିବ ଏବଂ ନିମ୍ନ ଆୟକାରୀ ପରିବାର ପାଇଁ ଏକ ସୁଲଭ ଭଡା ଘର ଯୋଜନା ଦ୍ରୁତ ଗତିରେ କାର୍ଯ୍ୟକାରୀ କରୁଛନ୍ତି। ଏହି ଯୋଜନାର ଲକ୍ଷ୍ୟ ହେଉଛି ଯେଉଁମାନେ କାମ ଖୋଜିବାକୁ ବଡ଼ ସହରକୁ ସ୍ଥାନାନ୍ତରିତ ହୋଇଥାନ୍ତି କିନ୍ତୁ ଅଧିକ ଭଡା କିମ୍ବା ଆର୍ଥିକ ପ୍ରତିବନ୍ଧକ ଯୋଗୁଁ ସ୍ଥାୟୀ ଘର କିଣି ପାରନ୍ତି ନାହିଁ ସେମାନଙ୍କ ପାଇଁ ଏକ ଉନ୍ନତ ଜୀବନଶୈଳୀ ଏବଂ ସୁରକ୍ଷିତ ଘର ଯୋଗାଇବା। ଏହି ଯୋଜନା ବିଶେଷ ଭାବରେ ପ୍ରବାସୀ ଏବଂ ଦିନ ମଜୁରିଆଙ୍କ ପାଇଁ କାର୍ଯ୍ୟକାରୀ କରାଯାଇଛି। ଯେଉଁମାନେ ସହରରେ ଆର୍ଥିକ କାର୍ଯ୍ୟକଳାପରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଥାନ୍ତି, ହେଲେ କମ ଆୟ ଯୋଗୁଁ ସୁରକ୍ଷିତ ଭଡ଼ା ଘର ନେଇପାରନ୍ତି ନାହିଁ।

ତେବେ ଏହି ଘର ପାଇବା ପାଇଁ ଆବେଦକ କିମ୍ବା ତାଙ୍କ ପରିବାରର କୌଣସି ସଦସ୍ୟଙ୍କର ଦେଶର କୌଣସି ସ୍ଥାନରେ ସ୍ଥାୟୀ ଘର ନଥିବା ଆବଶ୍ୟକ । ଆବେଦକଙ୍କ ପାଖରେ ଏକ ବୈଧ ଆଧାର କାର୍ଡ ଥିବା ଆବଶ୍ୟକ । ଆବେଦକଙ୍କ ପରିବାର ବିଗତ ୨୦ ବର୍ଷ ମଧ୍ୟରେ ଅନ୍ୟ କୌଣସି କେନ୍ଦ୍ର କିମ୍ବା ରାଜ୍ୟ ସରକାରଙ୍କ ଆବାସ ଯୋଜନାରୁ ଉପକୃତ ହୋଇ ନଥିବା ଆବଶ୍ୟକ । ସରକାର କେବଳ ଘର ଭଡା ନେବେ ନାହିଁ ବରଂ ଏହି ଆବାସିକ ପରିସରରେ ଦୈନନ୍ଦିନ ଜୀବନଯାପନ ପାଇଁ ଆବଶ୍ୟକୀୟ ଭିତ୍ତିଭୂମି ମଧ୍ୟ ବିକଶିତ କରିବେ । ଏଠାରେ ୨୪ ଘଣ୍ଟା ଜଳ ଯୋଗାଣ, ସ୍ୱେରେଜ ଏବଂ ଡ୍ରେନେଜ୍ ବ୍ୟବସ୍ଥା ଏବଂ ଏକ ସ୍ୱଚ୍ଛ ପରିବେଶ ଅନ୍ତର୍ଭୂକ୍ତ ହେବ। ଏହା ସହିତ, ଏହି ଆବାସିକ ପରିସରରେ ପକ୍କା ରାସ୍ତା, ଷ୍ଟ୍ରିଟଲାଇଟ୍, ଏକ ସାମୁଦାୟିକ କେନ୍ଦ୍ର, ଏକ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର ରହିବ। ଦୈନନ୍ଦିନ ଆବଶ୍ୟକତା କ୍ରୟ ପାଇଁ ପରିସର ମଧ୍ୟରେ ଛୋଟ ଦୋକାନ ଏବଂ ବାଣିଜ୍ୟିକ କାର୍ଯ୍ୟକଳାପ ପାଇଁ ମଧ୍ୟ ବ୍ୟବସ୍ଥା ରହିବ ।